Plektrudis

D Plektrudis (Bliktrud) († 10. August 725) isch us em vornähmste austrasische Adel und wird as Heiligi verehrt. Sie stammt vermuetlig us dr Hugobert-Irmina-Sippe.

Si isch wohrschiinlig d Dochter vo dr Irmina vo Oere und em Pfalzgraf Hugobert, em Seneschall vom Chlodwig III., gsi, und eso d Schwöster vo dr Äbtissin Adela vo Pfalzel bi Trier. Sit öbbe 670/675 isch se mit em karolingische Huusmeier Pippin em Mittlere verhürotet gsi. Mit ihm het si vili Schänkige an Chille und Chlöster gmacht. Es isch historisch wohrschiinlig, ass d Güeter, wo si bi dr Hürot mitbrocht het, im Pippin ghulfe hai, d Krise vom arnulfingische Huus z überwinde. Wohrschiinlig au wäge däm isch d Plektrudis bi alle Rächtsgschäfte vom Pippin drbii gsi. Ihri Söhn Drogo und Grimoald der Jüngeri si vom Pippin mit wichtige Böste usgstattet worde.

Churz vor em Tod vom Pippin het si brobiert, d Rächt vo ihre Grosschinder (ihri Söhn si scho gstorbe gsi) gege d Asprüch vom Pippin siim unehelige Sohn, em Karl Martell, z verdeidige. Dr Pippin het zuegstimmt, ass e unehelige Sohn vom Grimoald em Jüngere, dr Theudoald, ihn sött beerbe. D Plektrudis het dr Karl z Köln in s Gfängnis gheit. Er het aber chönne flüchte, het en Armee ufgstellt und het d Plektrudis 717 schliesslig zwunge, siini Rächt z anerkenne.

D Plektrudis isch d Gründere vo St. Maria im Kapitol z Köln gsi, wo si vermuetlig au begraben isch.